Sak wis’e meneer Daendels rekodoyo mbangun Dalan Raya Pos Anyer – Panarukan sing embong’e mbujur nang Suroboyo, alon-alon pusat ekonomi sing mau’ne onok nang lor mlipir ngidul.

Mergo ekonomi iku berkembang, gak titik wong-wong eropa sing mbangun omah lodji nang kidule kuto Suroboyo, sampe onok ukoro jabakota. Jaman semono lemahe Suroboyo jek akeh sing rupo alas lan kedung. Kewan koyok bajul, garangan, wergul lan manuk kuntul jek sering ditemoni penduduk Suroboyo.

Jare Wak Ri penduduk Pulo Wonokromo “Nang kene iki cak nek miturut critane buyutku, jaman biyen jek akeh barongan karo wit-witan sing ukurane gede. Nek parak surup hawane singup, gak onok uwong sing wani metu.. Terus, nek crito Kali njagir utowo kali londo, iku ngono kali sing angker lan akeh kalap’e, gak titik uwong sing ilang kecemplung nang kono”.

Nerusno critane Wak Ri “Lha nek sing nang kono iku cak, lor’e kantor minyak BPM (Pertamina). Iku ngono Dam Njagir kanggo mbendung banyu supoyo gak mili nang kuto sisih lor, ben banyune gak mbanjiri kuto Suroboyo… Sing mbangun yo nenek moyange awak dewe cak. Lha sing dadi mandor lan arsitek yo wong londo!”.

Bibit kawit’e Dam Jagir molai tahun 1879 gawe ngatasi perkoro banyu, utamane irigasi alami. Kuto Suroboyo dewe asline peres karo segoro, ukuran dukure banyu laut karo lemah cuma itungan kilan. Dadi nek wayah mongso rendheng koyok saiki, opo maneh pas wayahe padhang bulan sing banyune pasang, dipastekno Suroboyo kelem.

Tahun 1917 Dam Jagir molai dibangun teko boto, watu item lan semen campuran kapur supoyo kuat. Wektu iku ombohe lan dukure Dam Jagir podo karo ukuran kali Jagir. Baru tahun 1920 Dam Jagir didukurno, ditoto ulang karo arsitek G.C Citroen teko walondo.

Nang ndukure Dam Jagir dibangun menoro sing jumlahe papat model art deco, gunane gawe ngangkat lawange banyu lan mantau wilayah sekitar mbok menowo kecembeng banyu. Sampe saiki dam sing dibangun sak abad kepungkur iku jek digunakno, tapi wis nganggo mekanisme modern gawe ngangkat lawange banyu. Gawe peno sing seneng mancing, poto-potoan lan cangkruk nang Dam Jagir tetep kudu ati-ati!. (wan/shc)

Foto source Nationaal Het Archief